Қызылорда облысының Арал қаласында заманауи форматтағы «Keruen Inn» деп аталатын жол бойындағы сервистік кешен өз қызметін бастады. Ол «Самара – Шымкент» автожолы бойында орналасып, бір кеңістікте қонақ үйді, дәмхананы, сауда нүктесін, жанармай құю және электромобильдерге арналған қуаттау станцияларын біріктіреді.
Жол бойындағы кешен «барлығы бір жерде» форматында жұмыс істейді және саяхатшыларға кең қызметтер ұсынады. Нысанда жеке ыңғайлылығы мен жоғары жылдамдықтағы интернеті бар 31 қонақ үй нөмірі, дәмхана, күзетілетін автотұрақ, кір жуу орны, жолға қажетті тауарлары бар сауда нүктесі, жанармай бекеті және электромобильдерге қуаттау станциялары қарастырылған. Кешеннің жалпы аумағы 900 шаршы метрді құрайды, ол отбасылық туристерге, транзиттік жүргізушілерге және іскерлік сапармен жүрген жолаушыларға ыңғайлы болмақ.
Жаңа нысанның ашылуымен жергілікті тұрғындарға жаңа жұмыс орындары ұсынылды. Жоба жол бойындағы инфрақұрылымды дамытуда маңызды қадам болып, ішкі туристік бағыттардың тартымдылығын арттырады.
Қызылорда облысындағы «Keruen Inn» – Qazaq Oil компаниясының ауқымды инвестициялық жобасы аясында салынған екінші көпфункционалдық нысан. Бірінші кешен биылғы қыркүйек айында Жамбыл облысының Меркі ауданында ашылған. Компания 2029 жылға дейін елдің негізгі туристік және транзиттік бағыттарында жол бойындағы сервистік нысандар ашуды жоспарлап отыр.
Дереккөз: Kazakh Tourism