Геннадий Головкин World Boxing халықаралық федерациясының президенті болып сайланып, бұл лауазымды иеленген алғашқы қазақстандық ретінде тарихқа енді. Оның өкілеттік мерзімі үш жылды құрайды.
Сайлау World Boxing конгресі барысында өтті. Жиында ұйымның басқару органдарына жаңа мүшелер бекітіліп, Федерация регламентіне қатысты бірқатар мәселелер, халықаралық күнтізбе және ұйым құрылымын дамыту бағыттары талқыланды. Барлық шешімдер Федерация Жарғысына сәйкес, жеке дауыс беру арқылы қабылданды. Дауыс беруге 58 ұлттық федерацияның өкілдері қатысты.
Президент ретінде алғашқы сөзінде Головкин спорттық жолы мен болашақ мақсаттарын атап өтті.
«Мен бокс жолының барлық кезеңінен өттім. Олимпиадада ел намысын қорғадым, әлем чемпионы атандым. Енді спорт саласында көшбасшы ретінде жұмыс істеп келемін. Біздің мақсатымыз – әділ, қауіпсіз әрі спортшыларға сенім ұялататын Федерация құру», – деді ол.
Ол әділ басқару қағидаттарының маңызын атап өтіп, World Boxing ұйымы Олимпиадалық құндылықтарды, спортшылардың құқықтарын және тәуелсіздікті сақтайтынын жеткізді. Президент жаңа мандатқа сенім білдірген барлық делегаттарға алғыс айтты.
World Boxing – 2023 жылдың сәуірінде құрылған халықаралық бокс ұйымы. 2024 жылдың қыркүйегінде Головкин оның Олимпиадалық комиссиясының төрағасы болған еді. 2025 жылдың ақпанында Халықаралық Олимпиадалық комитет федерацияны уақытша мойындап, дүниежүзілік деңгейде боксты басқару құқығын берді. Ал наурыз айында ХОК боксты Лос-Анджелестегі 2028 жылғы Олимпиада бағдарламасына ресми түрде енгізді.
Қазіргі таңда World Boxing құрамына 136 елдің ұлттық федерациялары кіреді.
Дереккөз: ҚР Ұлттық Олимпиада комитеті