Qazaqstan Venture Group (Alem Ventures Fund қорлар қорының басқарушы компаниясы) алғашқы жабылу кезеңінде 115 млн доллар инвестиция тартқанын хабарлады. Осы кезеңде алғашқы инвесторлардың міндеттемелері бекітіліп, қор инвестициялық қызметін бастады. Қаржыландыруға Qazaqstan Investment Corporation, Freedom Holding Corp., Astana Hub және бірқатар жеке инвесторлар қатысты.
Венчурлік қорлар қоры 2024 жылдың желтоқсанында ҚР Премьер-министрі мен Цифрлық даму министрлігінің қолдауымен іске қосылған. Жоба еліміздің венчурлік экожүйесін дамытуға және өңірді жаһандық инновациялық экономикамен интеграциялауға бағытталған. 2025 жылдың шілдесінде QVG өңірлік және халықаралық қорларға инвестиция салатын Alem Ventures Fund-ты тіркеді.
Alem Ventures Fund-тың құрылуы Орталық Азия мен Кавказдағы венчурлік нарықтың жаңа кезеңін білдіреді. Қор өңірдегі технологиялық инвестицияларды жүйелі қолдауға арналған алғашқы институционалдық құрылымға айналды. Бұл халықаралық инвесторларға жергілікті нарықты жақсы білетін серіктеспен жұмыс істеуге мүмкіндік береді.
Қорды дамытудың маңызды серіктесі – Astana Hub. Ол тірек инвестор ретінде капитал тартуды қамтамасыз етіп, стартаптар мен серіктестердің кең экожүйесіне қол жеткізуге жол ашты.
Алғашқы кезең аяқталған соң қор инвестициялық фазаға өтті. Қазір ол стартаптарға және өңірлік технологиялық компанияларға инвестиция салатын венчурлік қорларды ашық іріктеуді жүргізуде. Сондай-ақ Alem Ventures Fund институционалды тәсіл мен экожүйеге үлес қосу әлеуеті бар жаңа басқарушылардың («First-Time Fund Managers») өтінімдерін де қабылдайды.