Шымкенттің Қаратау ауданында құны 69 млрд теңгені құрайтын заманауи жылыжай кешенінің құрылысы басталды. Ауқымды жобаны жүзеге асыруға Польша Республикасының Fabe-Agro компаниясы бастамашылық жасап, негізгі инвестор рөлін де өз мойнына алған.
Жалпы аумағы 144 гектарды қамтитын жаңа кешенде көкөністер, бақша дақылдары, түрлі тамыржемістер мен түйнектер өсірілетін болады. Қазіргі уақытта құрылыс алаңында инженерлік коммуникацияларды тарту жұмыстары қарқынды жүріп жатыр.
Жоба толық іске қосылған кезде жылыжай кешені жылына 36 мың тоннаға дейін жаңа піскен көкөніс өндіреді деп жоспарлануда.
Ірі инвестициялық жобаны аяқтау 2028 жылға жоспарланған. Жоспарланған мерзімде іске қосылса, бұл жылыжай кешені Оңтүстік өңірдегі ең ірі ауыл шаруашылығы нысандарының бірі болмақ.
Дереккөз: ҚР АШМ