Алматы мәслихаты шағын бизнес үшін арнайы салық режимінің мөлшерлемесін 2026 жылдан бастап 3 % деңгейінде сақтау туралы шешімді бірауыздан қолдады
Алматы қаласы мәслихатының депутаттары шағын бизнеске арналған жаңа арнайы салық режимі (АСР) бойынша мөлшерлемені 3 %-ға дейін төмендету туралы ұсынысты қолдады. Бұл шешім 2026 жылы күшіне енетін жаңа Салық кодексіне сәйкес қабылданды.
Алматы қаласы Кәсіпкерлік және инвестициялар басқармасының басшысы Берікбол Мәндібаевтың айтуынша, мөлшерлемені 3 % деңгейінде сақтау кәсіпкерлерге түсетін қосымша салық жүктемесін азайтады. Қазіргі таңда Алматыдағы шағын бизнес субъектілерінің көпшілігі қолданыстағы жеңілдетілген режим бойынша дәл осы 3 %-дық мөлшерлемемен жұмыс істейді. Егер жаңа мөлшерлеме жоғары белгіленсе, бұл олардың қаржылық тұрақтылығына кері әсер етуі мүмкін.
Салық өзгерістерінің әсері әсіресе B2C сегментіне, яғни үй маңындағы дүкендерге, қызмет көрсету нүктелеріне, сұлулық салондарына, техникалық жөндеу шеберханаларына және халыққа қызмет көрсететін басқа шағын кәсіпорындарға тиеді. Жаңа талаптарға сәйкес, жалпыға бірдей тәртіпте жұмыс істейтін бизнес АСР қолданатын кәсіпорындардан сатып алынған тауарлар мен қызметтерді шығысқа жатқыза алмайды. Мұндай шектеу серіктестік тізбектерін қысқартып, шағын бизнеске жүктемені арттыруы ықтимал.
Алматы қаласы әкімінің орынбасары Олжас Смағұлов аталған мәселе депутаттармен, кәсіпкерлер қауымдастығымен және Мемлекеттік кірістер департаментімен жан-жақты талқыланғанын айтты.
«Барлық тәуекелдер ескерілгеннен кейін мөлшерлемені 3 пайызға дейін төмендету ұсынылды, себебі бұл 200 мың алматылық кәсіпкердің тағдырына қатысты мәселе. Бюджет шығындары бойынша тәуекелдердің өтелетініне сенімдіміз. Бұл шешім бизнестің көлеңкеден шығуына, кәсіпкерліктің жандануына және компаниялардың басқа өңірлерге тіркелуінің алдын алуға ықпал етеді. Бір жыл ішінде салық базасының азаймай, керісінше өсетіні күтіледі», — деді әкімнің орынбасары.
Сонымен қатар ол Алматының келесі жылы республикалық бюджетке 490 млрд теңге көлемінде қаржы аударатынын (биыл – 250 млрд) атап өтті. Соған қарамастан, қала билігі шағын бизнеске қолдау көрсету бағытындағы шешімдерден бас тартпайтынын жеткізді.
Дереккөз: Алматы қаласының әкімдігі
