Абай облысында «Абай салбурыны – 2025» республикалық турнирі биыл Абай Құнанбайұлының 180 жылдығына орай ұйымдастырылды. Жидебай қорығы аумағында орын тепкен «TauKum» этно ауыл кешенінде өткен дәстүрлі жарысқа елдің түкпір-түкпірінен келген үздік құсбегілер қатысып, қыран құстардың шеберлігін танытты.
Екі күнге созылған тартысты турнирде 70-ке жуық бүркіт, сондай-ақ 14 ителгі мен 15 қаршыға сайысқа түсті. Құсбегілердің көрсетілімдерімен қатар, ұлттық мұраның тағы бір маңызды бөлігі — құмай тазы жарысы да ұйымдастырылды.
«Абай салбурыны – 2025» республикалық турнирі өз деңгейінде ұйымдастырылып, еліміздің ең үздік құсбегілерін бір алаңға жинады. Абай облысында ұлттық спорт түрлерін дамыту бағытында жүйелі жұмыс жалғасуда. Құсбегілікке қызығушы жас буынның қатары артып, осы саладағы тәжірибелі мамандар саны көбейіп келеді. Бұл халқымыздың рухани мұрасының болашаққа берік негізделіп, сенімді түрде жалғасын тауып келе жатқанын көрсетеді», – деді шараның жабылу салтанатында облыс әкімі Берік Уәли.
Бүркітшілер сайысында астаналық Ерасыл Серікбек «Қарашолақ» атты құсымен 1-орынды иеленді. Қаршыға бәсекесінде жамбылдық Берікболсын Бабажан«Қанжар» атты құсымен жеңімпаз атанса, ителгі жарысында Бабажан Бақдаулет «Қаракөз» атты құсымен жеңіске жетті. «Құмай тазы» додасында Үржар ауданының қатысушысы Рахат Ақылжанов көзге түсті.
Дереккөз: Абай облысының әкімдігі
