Астана қаласында орталық атқарушы органдар мен ауыл әкімдерінің қатысуымен өткен ашық талқылауда педагогтерді аттестациялау жүйесін жаңарту басты тақырыптардың біріне айналды. Министр Жұлдыз Сүлейменова қазіргі қағидалар бойынша қоғамнан көп ұсыныс түсіп жатқанын айтып, оларды қайта қарау жұмысы жүріп жатқанын хабарлады.
Кездесуде ауыл әкімдері магистратура бітірген педагогтерге біліктілік санатын автоматты түрде беру мүмкіндігін ұсынды. Алайда министр бұл ұсынысқа келіспейтінін айтты.
«Магистратура – ғылыми дайындықты көрсетеді, бірақ орта білім жүйесінде мұғалімнің кәсіби деңгейі ең алдымен сабақ беру шеберлігімен бағалануы тиіс. Сондықтан біліктілік санатын автоматты тағайындау дұрыс емес», — деді Жұлдыз Сүлейменова.
Министр сонымен бірге соңғы уақытта дау туғызған педагог-зерттеушілердің авторлық бағдарламаларына қатысты талаптар да қайта қаралатынын мәлімдеді. Бұл бағытта педагогикалық қауымдастықтың пікірлері ескеріліп жатыр.
Жиында шағын жинақты мектептерді қолдау шаралары да талқыланды. Ауылдағы білім сапасын көтеру, педагогтерді тарту және ынталандыру бойынша нақты бастамалар іске асырылатыны айтылды.
Қазіргі таңда министрлікке аттестациялау қағидатын өзгерту жөнінде көптеген ұсыныстар түсуде. Елімізде шамамен 600 мың педагог қызмет етеді.
Дереккөз: ҚР Оқу-ағарту министрлігі
