Д.Серікбаев атындағы Шығыс Қазақстан техникалық университетінде «SMART Driving Technology» инжиниринг орталығы ашылды. Бұл нысан Лу Бань шеберханасының дамуындағы жаңа кезең болып саналады және Қазақстан мен Қытай арасындағы инженерлік білім беру саласындағы стратегиялық ынтымақтастықты күшейтеді.
Лу Бань шеберханасы құрылған сәттен бастап тек оқу базасы емес, автомобиль өнеркәсібінің болашағына бағдарланған инновациялық орталыққа айналды. Мұнда Қазақстан мен шетелден келген студенттер электромобильдер, гибридті күш қондырғылары, интеллектуалды көлік жүйелері, жасанды интеллект және автономды жүргізу технологиялары бойынша білім алады.
Жаңа инженерлік орталық гибридті және электрлі автомобильдерге, автопилот платформаларына, AR/VR симуляторларына және цифрлық егіздер технологияларына қолжетімділікті кеңейтіп, шеберхананың функционалын айтарлықтай арттырады.
Салтанатты рәсімге қатысқан ҚР Ғылым және жоғары білім вице-министрі Гүлзат Көбенова орталықтың елдің стратегиялық міндеттерімен толық сәйкес келетінін айтты.
«Президенттің «Жасанды интеллект дәуіріндегі Қазақстан» Жолдауында смарт және пилотсыз көлік технологияларын жедел дамыту қажеттілігі атап өтілді. Бұл орталық – ұлттық технологиялық құзыреттер жүйесін қалыптастырудағы маңызды қадам. ШҚТУ білім, ғылым және инновацияны ұштастыруда жоғары әлеует көрсетіп келеді», – деді вице-министр.
Тяньцзинь кәсіптік университетінің президенті У Цзунбао да жобаның екі ел арасындағы ынтымақтастықты тереңдетіп отырғанын атап өтті.
«Лу Бань шеберханасы Қазақстан-Қытай ынтымақтастығының жаңа белесі болды. 2023 жылы бірінші кезең іске қосылса, бүгін оның екінші кезеңі жүзеге асып отыр. ШҚТУ индустрия сұранысы мен білім беру процесін тиімді біріктіріп, жоғары нәтижелерге қол жеткізуде», – деді ол.
«SMART Driving Technology» орталығы Қазақстандағы алғашқы автомобиль саласы мамандарын сертификаттау орталығын құруға негіз болмақ. Бұл елдің кадрлық дайындығын күшейтіп, көлік саласына озық технологияларды енгізуге мүмкіндік береді.
Жоба ҚР Ғылым және жоғары білім министрлігі, ШҚТУ және халықаралық серіктестердің бірлескен еңбегінің нәтижесінде жүзеге асты. Орталық инженерлік білім беру жүйесін нығайтып, интеллектуалды көлік саласының дамуына серпін береді және Қазақстанның технологиялық жаңғыруына үлес қосатын жаңа буын мамандарын даярлауға жол ашады.
Дереккөз: Ғылым және жоғары білім министрлігі
