5 желтоқсанда «Қазақконцерт» залында «Менің Қазақстаным» атты Шәмші Қалдаяқов әндерінің халықаралық фестивалі өтеді.
Фестиваль Қазақстанның Халық әртісі, көрнекті композитор Шәмші Қалдаяқовтың шығармашылық мұрасын насихаттап, оның әндерінің ұлттық музыкалық мәдениеттегі орнының ерекше екенін көрсетуді көздейді. Концерттік бағдарламада композитордың танымал туындылары заманауи өңдеуде және кәсіби орындаушылардың шеберлігі арқылы жаңаша ұсынылады.
Фестивальге Қазақстанның әншілерінен бөлек Түркия, Өзбекстан, Башқұртстан, Моңғолия мен Армениядан арнайы шақырылған шетелдік өнерпаздар қатысады.
Іс-шарада «Қазақконцерт» ұйымының жетекші солистері мен шығармашылық ұжымдары да бірлескен қойылымдар ұсынады.
Сонымен қатар, республикалық және халықаралық байқаулардың лауреаттары, «Astana Musical» мемлекеттік театрының әртістері және Қазақ мемлекеттік симфониялық оркестрінің камералық ансамблі өнер көрсетеді.
Дереккөз: Мәдениет министрлігі