Қазақстан Еуразия кеңістігіндегі өңірлік білім беру орталығы ретіндегі позициясын нығайтып келеді. 2025 оқу жылында ел университеттерінде 88 мемлекеттен келген 35 075 шетелдік студент білім алып жатыр. Бұл өткен жылмен салыстырғанда 11 пайызға көп.
Министрліктің дерегінше, шетелдік студенттер легінің артуы Қазақстанның сапалы білім беру бағдарламаларын, қолжетімді оқу ақысын және халықаралық серіктестіктерді ұсынатын бәсекеге қабілетті академиялық орта ретінде танымал екенін дәлелдейді. Шетелдік студенттердің негізгі бөлігі Үндістан (9 959), Түрікменстан (9 089), Өзбекстан (4 136), Қытай (3 367) және Ресейден (2 426) келген. Бұл тенденция медицина, инженерия, IT және әлеуметтік-экономикалық бағыттарға деген сұраныстың жоғары екенін көрсетеді.
Шетелдік талапкерлер үшін қолжетімді оқу ақысы, қазақстандық дипломдардың танылуы және тәжірибелік дайындыққа басымдық берілуі Қазақстанды өңірдің білім беру орталығы ретінде тартымды ете түсуде. Студенттер негізінен Алматы, Астана және Шымкент қалаларына шоғырланған. Алматыда 18 195 шетелдік студент оқиды, бұл қаланы Орталық Азиядағы ірі білім беру кластеріне айналдырды. Астана ғылыми-зерттеу орталығы ретіндегі әлеуетін арттырып келеді, ал Шымкент өңірдің индустриялық-білім беру хабына айналып жатыр.
Шетелдік студенттері ең көп оқитын ұлттық университеттер қатарында әл-Фараби атындағы ҚазҰУ (4 497), С.Асфендияров атындағы ҚазҰМУ (2 687), Л.Н. Гумилев атындағы ЕҰУ (2 483), Қ.Сәтбаев атындағы ҚазҰТЗУ (1 759) және М.Әуезов атындағы ОҚМУ (1 730) бар. Бұл жоғары оқу орындарының бағдарламаларына деген халықаралық сенімнің артқанын байқатады.
Шетелдік студенттердің басым бөлігі денсаулық сақтау және медицина (12 950), педагогика (5 943), бизнес және құқық (4 539), инженерия (3 374) және ақпараттық технологиялар (2 141) бағыттарын таңдаған.
Дереккөз: Ғылым және жоғары білім министрлігі