Жұмыссыз қалған қазақстандықтар алты ай көлемінде мемлекеттен жәремақы ала алады. Бұл жәрдемақы жұмыстан босату себебіне қарамастан, мемлекет тағайындайтын ай сайынғы әлеуметтік төлемдер.
«Азаматтарға арналған үкімет» корпорациясы қазақстандықтарға жұмыссыздық бойынша жәрдемақыны қалай алуға болатыны және қандай құжаттарды ұсыну қажеттігі туралы айтып берді. Мемкорпорация мәсілеметінше, бұл жәрдемақыны алу үшін бірқатар шарттар сақталуы керек.
Атап айтқанда, өтініш беруші ресми түрде жұмыс істеген болуы керек. Сондай-ақ адам үшін кемінде 6 ай бойы аударымдар түскен болуы тиіс және өтініш беруші ресми түрде жұмыссыз мәртебесін алған болуы қажет.
Сондай-ақ, мамандар әлеуметтік төлемге өтінішті келесі жолдармен беруге болатынын нақтылады:
• ХҚКО;
• мансап орталығы;
• электрондық үкімет порталы;
• «Электрондық еңбек биржасы» порталы;
• проактивті режимде;
• екінші деңгейлі банктердің қосымшалары арқылы.
Халыққа қызмет көрсету орталығы арқылы өтініш берген кезде өтініш пен жеке басын куәландыратын құжатты ұсыну керек. Ал проактивті форматта қызмет алған кезде, өтініш берушінің проактивті қызмет көрсетуге келісімі, сондай-ақ, бұрын тіркелген нөмірге жіберілген SMS-хабарламаға жауап ретінде міндеттемелерді қабылдауы және банктік шот нөмірін растауы немесе ұсынуы қажет.
Айта кету керек, Қазақстанда жұмыссыздық бойынша төлемдер азамат жұмыссыз мәртебесін алған күннен бастап есептеліп, төлем 6 айға дейін беріледі.
Дереккөз: ХҚКО
