Жамбыл облысында жаңа футбол академиясының іргетасына капсула салу рәсімі өтті, оған өңір басшысы Ербол Қарашөкеев қатысты.
Облыс әкімі аталған нысан тек ғимарат қана емес, болашақ чемпиондар мен футболшылардың жаңа буынын қалыптастыратын орда екенін атап өтті.
«Бүгін капсуланы салтанатты түрде орналастыру – алда күткен үлкен жетістіктердің нышаны. Бұл академиядан ел сенімін арқалайтын дарынды, талапты жас футболшылар өсіп шығатынына кәміл сенеміз. Жаңа академия қазақ футболына тың серпін беріп, бізді жаңа белестерге бастай берсін», деді Ербол Қарашөкеев.
Қазақстан футбол федерациясының Бас хатшысы Давид Лория және «Halyk» қайырымдылық қорының атқарушы директоры Ғалымбек Жақсылықов жаңа академияның қазақ футболын дамытудағы рөліне тоқталды.
Жобаның құны шамамен 3,5 млрд теңгені құрайды, онда футбол жасөспірімдердің кәсіби өсуі мен дамуына ерекше назар аударылады. Ол үшін заманауи материалдық база жасақталып, тәжірибелі жаттықтырушылар жұмыс істейді, ал оқу-жаттығу процесінде ғылыми негізделген әдістемелер қолданылады деп жоспарланған.
Жас футболшылардың жайлы өмір сүруі үшін 100 орындық жатақхана салу көзделген. Академия 2027 жылы пайдалануға беріледі деп жоспарланып отыр.
Айта кетейік, жоба Қазақстан футбол федерациясы, «Halyk» қайырымдылық қоры және Жамбыл облысы әкімдігі арасындағы серіктестік аясында жүзеге асырылып жатыр.
Дереккөз: Жамбыл облыстық әкімдігі
