Энергетика министрлігінің мәліметінше, биылғы жөндеу науқаны аясында электр станцияларында 10 энергоблокты, 63 қазанды және 39 турбинаны жөндеу жоспарланған. Қазіргі уақытта 9 энергоблокта, 56 қазанда және 37 турбинада жөндеу толық аяқталды. Сонымен қатар 17 мың шақырым электр желісі мен 420 қосалқы станция жөнделді.
Жылу желілерінде 323 шақырым магистраль жаңғыртылып, биылғы жөндеу жұмыстарына 396 млрд теңге бөлінді. Бұл өткен жылмен салыстырғанда 18%-ға артық.
Энергия көздеріндегі жанармай қорлары нормативке сай жинақталған: қоймаларда 5,6 млн тонна көмір және 148 мың тонна мазут бар. Биыл өңірлерге 257 мың тонна «әлеуметтік» мазут жеткізу жоспарланған.
Өңірлердің жылыту маусымына қажетті көмір көлемі 7,4 млн тоннаны құрайды. Қазіргі таңда 6,4 млн тонна көмір дайындалған, бұл қажеттіліктің 86%-ы.
Энергетика министрлігі әкімдіктермен, «ҚТЖ» және көмір өндіруші кәсіпорындармен бірлесіп, көмір жеткізілімінің үздіксіздігін қамтамасыз ету үшін республикалық штаб отырыстарын тұрақты өткізіп келеді.
Дереккөз: ҚР Энергетика министрлігі
