Азық-түлікпен қамтамасыз ету шаралары Агроөнеркәсіп кешенін дамытудың 2030 жылға дейінгі тұжырымдамасында (АКД) және 2028 жылға қарай ауыл шаруашылығының жалпы өнім көлемін екі еселеу жөніндегі жол картасында белгіленген. Ауыл шаруашылығы министрлігінің деректеріне сәйкес, 2021-2024 жылдар аралығында жалпы өнім көлемі 11,3%-ға өсіп, 7,5 трлн-нан 8,3 трлн теңгеге дейін жеткен. Оның ішінде өсімдік шаруашылығы 14%-ға (4,4-тен 5 трлн теңгеге дейін), ал мал шаруашылығы 5,6%-ға (3,1-ден 3,29 трлн теңгеге дейін) артқан. 2025 жылдың бірінші жартыжылдығының қорытындысы бойынша өсім 3,7%, яғни 1,8 трлн теңге көлемінде тіркелді.
Азық-түлік өндірісі де 10,5%-ға өсіп, 1,8 трлн теңгеге жеткен. Сондай-ақ сүт, ет, ұн, макарон өнімдері, өсімдік майы мен сары май өндіру көлемі де артқан.
Ауыл шаруашылығы министрлігінің мәліметінше, Қазақстан негізгі азық-түлік тауарларының 80-100% және одан да көп бөлігін өз күшімен қамтамасыз етіп отыр.
«Ет, сүт, жұмыртқа, көкөніс, ұн – осының бәрі ел халқын толық қамтуға жеткілікті мөлшерде өндіріледі. Сонымен қатар импорт әлі де құс еті, шұжық, ірімшік, қант және балық бойынша сақталып отыр», – деді ауыл шаруашылығы вице-министрі Ермек Кенжеханұлы.
Мәселені шешу үшін инвесторлармен бірлесіп бірқатар ірі жоба іске қосылуда. Мысалы, 2022-2024 жылдары қуаттылығы 144 мың тонна болатын 17 құс фабрикасы іске қосылды. Бұл құс етімен қамтуды 67%-дан 79%-ға дейін арттыруға мүмкіндік берді. 2028 жылға дейін тағы 41 кәсіпорын іске қосылып, бұл салада толық өзін-өзі қамтамасыз етуге қол жеткізілмек.
2019 жылы елімізде небәрі 19 сүт фермасы жұмыс істеген болса, бүгінде олардың саны 69-ға жетті, ал тағы 47-інің құрылысы жүріп жатыр. Барлығы 116 ферма толық іске қосылғаннан кейін, сүт өндірісі жылына 600 мың тоннаға артады, бұл көрсеткіш ірімшік пен сүзбе бойынша ішкі сұранысты толық өтеуге мүмкіндік береді.
