Алматының барлық қалалық емханаларында дыбыстық роботтары толыққанды іске қосылды. Бұл ADMC (Almaty Digital Medical Center) жобасы аясында жүзеге асқан кешенді цифрлық жаңғыртудың бір бөлігі. Жүйе күн сайын қала тұрғындарына вакцинация, скрининг, флюорография және профилактикалық тексеруден өту қажеттілігін ескерту үшін жүздеген автоматты қоңыраулар шалады.
Бұрын бұл міндет медициналық персоналға жүктеліп, медбикелер күніне орта есеппен 15–20 қоңырау ғана орындайтын. Қоңырау шалу көп уақыт алып, мамандардың жүктемесін арттыратын. Автоматтандыру енгізілгеннен кейін қайталанатын және эмоциялық тұрғыдан күрделі жұмыс роботқа өтті: ол пациентпен байланыс орнатып, алдын ала ақпарат беріп, қабылдауға келуді еске салады.
№3 қалалық емхананың медбикесі Бақыт Құсайынованың сөзінше, аталған роботтар олардың жұмысын жеңілдеткен.
«Дауыс роботтары біздің жұмысымызды едәуір жеңілдетті. Енді біз пациенттермен тікелей жұмысқа және сапалы медициналық көмек көрсетуге көбірек уақыт бөле аламыз. Бұл уақыт пен күшті үнемдейді, ал қала тұрғындары профилактикалық тексерулер туралы дер кезінде хабар алады», деді ол.
Жүйенің негізгі артықшылықтарының бірі — қоңырауларды кең ауқымда өңдеу мүмкіндігі. Роботтар қазақ және орыс тілдерінде сөйлей алады, сонымен қатар жауап алынғанға дейін бірнеше рет қоңырау шалуды жалғастырады. Жасанды интеллекттің көмегімен мыңдаған қоңырауды қатар өңдеу мүмкіндігі емханалардың ішкі процестерін оңтайландырып, фронт-офистегі қызметкерлердің жүктемесін азайтады.
ADMC цифрлық медицина орталығы жобаның негізгі операторы болып табылады. Орталық қаланың медициналық ұйымдарын біріктіретін сервистерді дамытып, бірыңғай 1312 байланыс орталығын іске қосқан. Сонымен қатар, телемедициналық патронаж және онлайн-консультациялар енгізіліп, медициналық қызметтердің қолжетімділігі мен сапасы артты.
Әкімдік ADMC бастамасы Алматының денсаулық сақтау жүйесінде цифрлық трансформацияның нақты нәтижелерін көрсететінін айтады: роботтандыру ресурстарды үнемдейді, пациенттермен байланысты күшейтеді және медициналық қызметтердің тиімділігін жаңа деңгейге шығарады.
Дереккөз: Алматы әкімдігі
