2025 жылы Алматыда 1 мың шақырымнан астам таудағы жүргінші бағыттары сандық жүйеге көшірілді, оның ішінде 750 шақырымға жуық бөлігі абаттандырылып, жаңадан 7 кемпинг аймағы пайда болды.
Биыл 10 басым тау бағыты көркейтілуде. Олардың қатарында Көкжайлау жотасына көтерілетін бағыттар, «Нұрлытау» маңынан басталатын соқпақтар, Бутаковка бағыты, «Халық соқпағы», Кімасар мен «Панорама» бағыттары және тағы басқалары бар. Жұмыс аясында навигациялық көрсеткіштер, ақпараттық тақталар, түрлі-түсті бағыттық белгілер, демалыс алаңқайлары, орындықтар, қоршаулар мен қауіпсіздік элементтері орнатылды. Соқпақтарда құлама тастардан қорғау құрылғылары, ағаш өткелдер, баспалдақтар және арнайы демалыс алаңдары жасақталды.
Алма-Арасан шипалы бұлағы маңындағы кешенді қайта жаңғырту аяқталды. 775 метрлік жүргіншілер соқпағы қайта абаттандырылып, еңіс бөліктері бекітілді, көпірлер қалпына келтірілді және қауіпсіздік элементтері орнатылды.
Қолжетімділікті арттыру үшін баспа өнімдері, сонымен қатар үш тілде Брайль қарпімен материалдар әзірленді. 110-нан астам туристік нысан мен 10 маршрутты қамтитын аудиогид бес тілде жасалды.
Тау инфрақұрылымын дамыту және цифрлық сервистерді енгізу Алматыны белсенді демалысты ұнататын азаматтар үшін қауіпсіз әрі тартымды ете түспек. Бұл экотуризм саласында жаңа өнімдер қалыптастыруға және туристердің қалаға деген қызығушылығын арттыруға ықпал ететін болады.
Дереккөз: Алматы қаласының әкімдігі