Қазақстанның Еңбек және халықты әлеуметтік қорғау министрлігі Корея Республикасының Әділет министрлігімен бірлесіп, Оңтүстік Кореяда заңсыз жүрген қазақстандықтар үшін ерікті түрде елден шығу бағдарламасының мерзімін ұзарту туралы келісімге келді. Бұдан былай отандастарымыз айыппұлсыз және қайта кіруге тыйымсыз Оңтүстік Кореядан 2025 жылғы желтоқсаннан 2026 жылдың ақпанына дейін еліне орала алады.
Бұл қадам азаматтардың құқықтық салдарларды жеңілдетіп, мәртебесін реттеуіне мүмкіндік беру үшін қабылданды. Бағдарлама қылмыстық құқықбұзушылық жасағандарға, мәжбүрлеп шығару шарасы қолданылғандарға, сондай-ақ 2025 жылғы 1 желтоқсаннан кейін заңсыз мәртебеге түскен тұлғаларға арналмаған.
Ерікті түрде елден шығу үшін азаматтарға төлқұжат, арнайы өтініш және әуе билеті қажет. Кореяның иммиграция кеңсесіне алдын ала хабарлама сапар күніне 15–3 күн қалғанда беріледі.
Министрлік қазақстандықтарды шетелде тек заңды негізде жұмыс істеуге шақырды. Ведомствоның мәліметінше, тексерілмеген арналар арқылы жұмыс іздеу шетелде еңбек қанауы, депортация, айыппұл және құқықтық шектеулерге әкелуі мүмкін. Осыған байланысты азаматтарға тек ресми жұмыспен қамту агенттіктері мен мемлекеттік бағдарламаларға жүгіну ұсынылады.
