Жезқазғанда Қазақстандағы ең алғашқы әрі Орталық Азиядағы ең ірі геологиялық кластер ресми түрде іске қосылды. Жаңа орталық геологиялық барлаудың барлық негізгі үдерістерін бір алаңда біріктіріп, геология саласын цифрландыру мен жедел талдаудың жаңа деңгейіне шығармақ.
Кластерде әлемде небәрі жеті орталықта ғана қолданылатын заманауи технологиялар орнатылған. Мұнда оқу орталығы мен зертханалық кешен бір жерде шоғырланып, геологиялық ақпаратты жедел алуға және барлау барысында шұғыл шешім қабылдауға мүмкіндік береді.
Жобаны жүзеге асыруға «Қазақмыс корпорациясы» ЖШС 11 млрд теңге көлемінде инвестиция құйған. Құрылысты отандық Tansu Construction компаниясы жүргізді. Алаңда 200-ден астам жаңа жұмыс орны ашылып, басқару міндеті Kazakhmys Barlau ЖШС-ға жүктелді.
Кластер құрамында еліміздегі ең үлкен керн қоймасы орналасқан. Оның сыйымдылығы 200 мың қума метр кернді сақтауға мүмкіндік береді және бастапқы геологиялық деректердің ұлттық мұрағатын қалыптастырады.
Зертханалық блок аустралиялық ALS компаниясымен бірлесіп әзірленген. Сонымен қатар, кластерде ұңғымалық кернді автоматты сканерлейтін немістің Ancorelog технологиясы және алынған деректерді өңдеуге арналған жасанды интеллект негізіндегі LithoLens бағдарламасы қолданылады.
«Біз Қазақстан геологиясын дәлірек, жедел әрі технологиялық тұрғыдан озық ететін инфрақұрылым ашып отырмыз. Бастапқы деректерді сақтау, зертханалық талдау, цифрлық өңдеу және мамандарды оқыту – барлығы бір алаңға біріктірілді», – деп атап өтті «Қазақмыс корпорациясы» ЖШС Басқарма төрағасы Нұрахмет Нуриев.
Кластер базасында Colorado School of Mines-пен бірлескен заманауи геофизикалық зертхана жұмыс істейді. Сондай-ақ, диспетчерлік орталық «Kazakhmys Barlau» ЖШС-ның барлау жұмыстарын басқарудың бірыңғай нүктесі ретінде қызмет атқарады.
Дереккөз: ҚР Өнеркәсіп және құрылыс министрлігі