Жыл басынан бері облыстық Сауда және тұтынушылардың құқықтарын қорғау департаменті әлеуметтік маңызы бар тауарлардың бағасын негізсіз көтергені үшін 147 кәсіпкерді әкімшілік жауапкершілікке тартты.
Облыс әкімдігі әлеуметтік маңызы бар азық-түлік тауарларының бағасын тұрақтандыруға бағытталған бақылау жұмыстары жалғастырып жатыр. Биыл жыл басынан бері өңірде 137 кәсіпкер рұқсат етілген үстеме бағаны асыра пайдаланған, ал 10 кәсіпкерде тауардың нақты бағасы бағалық жапсырмадағы көрсеткішке сәйкес келмеген.
«Нәтижесінде 112 бизнес субъектісіне жалпы сомасы 5 миллион теңгеден асатын айыппұл салынды. Ең жиі заңбұзушылық қант, күріш, қарақұмық, ұн, макарон және тұз сату кезінде тіркелсе, көкөніс, сүт өнімдері мен ет саудасында бұл жағдай сирек кездеседі», деді облыстық әкімдікте.
Қазір әкімдікте бағаның негізсіз өсуін болдырмау мақсатында облыста делдалдық схемаларды зерттейтін арнайы комиссия жұмыс істейді. Комиссия құрамына сауда, тұтынушылардың құқықтарын қорғау, мемлекеттік кірістер, экономикалық тергеу департаменттерінің, сондай-ақ бәсекелестікті қорғау және дамыту агенттігі мен жергілікті атқарушы органдардың өкілдері кіреді.
Атап айтқанда комиссия ірі сауда желілерінің шот-фактураларын жүйелі түрде тексеріп, тауардың өндірушіден дүкен сөресіне дейінгі қозғалысын бақылайды. Бұл тәсіл артық делдалдықты жояды және нәтижесінде негізсіз үстеме бағалардың пайда болуына жол бермейді. Қазіргі күні комиссияның жұмыс нәтижесінде бес ірі сауда желісі мен 25 көтерме жеткізуші әкімшілік жауапкершілікке тартылды.
Дереккөз: Қарағанды облыстық әкімдігі