Еуразиялық даму банкі Қазақстанның ирригация саласын жаңғыртуға 5,3 млн доллар грант бөледі. Қазақстандағы тұрақты ирригация үшін бизнес экожүйені дамыту жобасы бойынша үш жақты келісімге Су ресурстары және ирригация министрлігі, Қазақстандағы БҰҰ Даму бағдарламасы (БҰҰДБ) және Еуразиялық даму банкі (ЕАДБ) қол қойды.
Аталған жоба бірнеше жылға жоспарланған. Оның аясында Ұлттық су ресурстары ақпараттық жүйесін құру, су болжамы және тиімді бөлу құралдарын енгізу, заманауи ирригацияның өңірлік орталықтарын қалыптастыру, мамандардың біліктілігін арттыру, сондай-ақ су үнемдеу технологияларын енгізу көзделген.
«Бұл бастама Қазақстанның ирригация жүйесін дамытуға және суды тиімді пайдалануды арттыруға бағытталған. Біздің бұл жобаға қатысуымыз су шаруашылығын жаңғырту және климаттық өзгерістерге бейімделу жөніндегі стратегиялық мақсаттарымызды жүзеге асыруға мүмкіндік береді», деді министр Нұржігітов.
Сонымен қатар ол елдің су саласына инвестиция тарту бойынша белсенді жұмыс жүргізіліп жатқанын атап өтті. Оның сөзінше, барлық стратегиялық шешім тек Қазақстанда қабылданады. Су ресурстары мен нысандарын шет мемлекеттердің қолданысына беру мәселесі ешқашан қаралмағанын айтты.
Дереккөз: Су министрлігі
