«Атамекен кәсіпкерлер палатасы Қазақстан Үкіметі оңайлатылған декларация негізіндегі арнаулы салық режимін (АСР) қолдануға тыйым салынған қызмет түрлерінің тізбесін бекітетін қаулыға қол қойып, оны жариялағанын ресми түрде мәлімдеді,
Бұл шешім мемлекеттік органдар, кәсіпкерлер палатасы, қоғам белсенділері мен салалық қауымдастықтардың ұзақ мерзімді талқылауынан кейін қабылданды.
«Біз басты мақсатқа қол жеткіздік – мемлекет пен кәсіпкерлер мүдделерінің тепе-теңдігін қамтамасыз еттік. Құжаттың соңғы нұсқасы дайындалып, адал жұмыс істейтін кәсіпкерлердің басым бөлігі өздеріне ыңғайлы оңайлатылған режимде қызметін жалғастыра алатын болды», – деді палатада.
Тізімде қандай қызмет түрлері жалпыға бірдей салық салу тәртібіне көшуге міндетті екені нақты көрсетілген.
Осылайша, барлығы 44 негізгі санат пен 185 нақты қызмет түрі (ЭҚЖЖ бойынша) оңайлатылған салық режимінен шығарылды.
Тізімге жоғары табысты және мемлекеттің қатаң бақылауындағы қызмет түрлері енгізілді.
Арнаулы салық режимін қолдануға тыйым салынған негізгі бағыттар:
• Барлық қаржылық, сақтандыру және делдалдық қызметтер, оның ішінде ломбардтар, банктер, сақтандыру брокерлері мен агенттері.
• Акцизделетін өнімдерді (темекі, алкоголь) өндіру және көтерме саудасы, сондай-ақ бензин, дизель және мазут сату. (Сұйытылған газдың бөлшек саудасы тізімге кірмейді)
• Кеңес беру және маркетингтік қызметтер, бухгалтерлік есеп пен аудит, сондай-ақ адвокаттық және нотариалдық қызмет.
• Тұрғын және тұрғын емес үй-жайлардың құрылысы – жобалау мен құрылыс жұмыстары, сондай-ақ тұрғын үй қорын (көпқабатты және жеке үйлерді) сату немесе сатып алу.
• Барлық пайдалы қазбаларды өндіру (алтын іздеу қызметінен басқа), түсті және қара металл сынықтарымен айналысатын қызмет түрлері.
• 1, 2 және 3 санаттағы стационарлық сауда нысандарына және сауда нарығына жататын объектілерді қайта жалға беру (субаренда) қызметі.
Сонымен қатар бұл тізімге 4 және 5 санаттағы, ауданы 200 шаршы метрден аспайтын нысандар, яғни минимаркеттер мен үй жанындағы дүкендер кірген жоқ.
«Атамекен» барлық кәсіпкерлерге өз қызмет түрлері мен ЭҚЖЖ кодтарын тексеріп, егер олар тыйым салынған тізімге енгізілген болса, 2026 жылғы 1 қаңтарға дейін жалпыға бірдей салық салу тәртібіне өтуге дайындалу қажеттігін ескертті.
Салық режимін уақтылы ауыстыру үшін өз қызметін мұқият талдау кәсіпкерлерге өзгеріс кезеңін айыппұлсыз және қиындықсыз өткеруге мүмкіндік береді.
Сондай-ақ оңайлатылған декларация негізіндегі АСР шеңберінде жасалған мәмілелер бойынша шегерімдерге қатысты шектеулер бар екенін атап өтті.
Еске салсақ, бұған дейін кәсіпкеролер палатасы мәслихаттарды салық реформасын талқылауға белсенді қатысып, 2025 жылдың 1 желтоқсанына дейін оңайлатылған декларация негізінде жаңа арнайы салық режимі (АСР) бойынша мөлшерлемелерді төмендету жөнінде жедел және нақты шешім қабылдауға шақырған болатын.
-