Қазақстанда биылғы жылы агроөнеркәсіптік кешеннің (АӨК) дамуы 105% деңгейінде тұрақты өсім көрсетті. Бұл туралы Ауыл шаруашылығы министрі мәлімдеді.
Өсімді негізінен өсімдік шаруашылығы құрап отыр, бұл салада екінші жыл қатарынан рекордтық өнім жиналды. Ел бойынша жалпы астық көлемі 27 млн тоннаға жетті, орташа түсім гектарына 17 центнер болды. Бірқатар шаруашылықтар 40 центнерден және одан жоғары өнім алған.
Министрдің айтуынша, соңғы екі жылда минералды тыңайтқыш қолдану көлемі үш есеге өсіп, 1,8 млн тоннаға жетті. Ауыл шаруашылығы техникасын жаңарту деңгейі 6,5% болды. Бұл аграрларға шамамен 25 мың бірлік жаңа техника мен жабдық сатып алуға мүмкіндік берді.
Елімізде егіс алқаптарын әртараптандыру белсенді жүзеге асуда. Бидай егілетін жер көлемі шамамен 900 мың гектарға қысқарды, ал майлы дақылдар көлемі 4 млн гектарға, бұршақ дақылдары 780 мың гектарға жетті.
Жиналған өнім ішкі нарық қажеттілігін толық қамтамасыз етіп, экспорт көлемін ұлғайтуға жол ашты. Биылғы жылғы экспорт көлемі – 13,4 млн тонна.
Дереккөз: ҚР АШМ