Қазақстан Үкіметі астық экспорттаушыларды қолдау үшін қосымша 7 млрд теңге бөлді. Қаражат көлік шығыстарын субсидиялаудың қолданыстағы бағдарламасы бойынша мемлекеттің міндеттемелерін толық орындауға, сондай-ақ приоритетті шетелдік нарықтарға жеткізуді одан әрі ынталандыруға жұмсалады.
Ауыл шаруашылығы министрлігінің мәліметінше, қосымша қаржыландыру қажеттігі дәнді дақылдардың жоғары өнімділігі мен шетелдік сатып алушылар тарапынан қазақстандық астыққа деген сұраныстың артуына байланысты туындап отыр.
«Биыл көлік шығындарын субсидиялауға Үкімет резервінен 31 млрд теңге бөлінді. Бұл қаражат қазақстандық өнімнің жаңа экспорттық бағыттарға шығуын, бұрын болған нарықтарға қайтадан қол жеткізуді және баламалы логистикалық маршруттар бойынша алыс шет елдерге экспорт көлемін ұлғайтуды қамтамасыз етті», делінген ведомство ақпаратында.
Аталған шаралардың нәтижесінде жаңа және қалпына келтірілген нарықтарға астық жеткізу көлемі 2,5 млн тоннадан асқан.
Еске салсақ, бұған дейін 2026 жылға арналған көлік шығыстарын субсидиялау бағдарламасын кемінде 30 млрд теңге көлемде қаржыландыра отырып ұзарту туралы шешім қабылданған болатын.
Дереккөз: Ауыл шаруашылығы министрлігі
