Жамбыл облысында биылғы қант қызылшасын жинау науқаны 88,1% деңгейінде аяқталып, 207 мың тонна өнім жиналды. Барлық шикізат Меркі қант зауытына жөнелтілуде. Өңірде аталған салаға жергілікті бюджеттен 6,9 млрд теңге, республикалық бюджеттен қосымша 5,3 млрд теңге қарастырылған.
Облыс әкімі Ербол Қарашөкеевтің айтуынша, өңірде заманауи қант қызылшасы кластерін қалыптастыру, өндірушілерді қолдау тетіктерін кеңейту және өңдеу саласын дамыту бойынша нақты жоспарлар жүзеге асырылуда.
Облыстың жалпы ауыл шаруашылығы өнімі 458,5 млрд теңгені құрап, өсім 3,1%-ға жетті. Егіс алқаптары 640 мың гектарға ұлғайып, өнім көлемі 3,3 млн тоннаға жетті. Ауыл шаруашылығын қолдауға жалпы 29,1 млрд теңге субсидия бағытталды. Тірідей салмақтағы ет өндірісі 2,7%, сүт өндірісі 1,6% өсті.
Экспорт көрсеткіші де артып отыр. Облыс бойынша 888,7 мың тонна ауыл шаруашылығы өнімдері жөнелтілді, оның ішінде 410 мың тонна пияз экспортталды.
Мемлекеттік қолдаудың нәтижесінде ауыл шаруашылығы техникасы паркі жаңартылып, 762 бірлік техника сатып алынды. «Ауыл аманаты» бағдарламасы аясында 3,2 млрд теңгеге 437 жоба қаржыландырылды.
Суару және мелиорация жүйелерін дамыту жұмыстары да жүргізілуде. 66,5 мың гектарға су үнемдеу технологиялары енгізіліп, 2,8 млрд теңгеге тамшылатып суару жабдықтарын шығаратын өндіріс іске қосылды. Жаңа зауыт 2026 жылдың бірінші тоқсанында толық жұмысын бастайды.
Сонымен қатар, ЕҚҚДБ және Халықаралық қайта құру және даму банкімен бірлесіп, 625 шақырымдық 322 каналды қайта жаңғырту жобасы жүзеге асырылуда. 2029 жылға дейін 11 жаңа су қоймасы салынып, 3 жұмыс істеп тұрған қойма жаңартылып, 312 канал жөнделеді.
Дереккөз: Жамбыл облысының әкімдігі
