Finprom.kz ұсынған деректерге сәйкес, Қазақстандағы туристік сақтандыру нарығы тұрақты өсім көрсетіп келеді. 2025 жылдың қаңтар-қазан айларында туристік сақтандыру бойынша жиналған сақтандыру сыйлықақылары 11,8 млрд теңгені құрап, өткен жылдың сәйкес кезеңімен салыстырғанда 15,6 пайыз артты. 2024 жылы бұл көрсеткіштің өсімі 6,6 пайыз деңгейінде болған еді.
Соған қарамастан, туристік сақтандырудың бүкіл сақтандыру нарығындағы үлесі екі жыл қатарынан 0,8 пайыз шамасында қалды. Ал 2022-2023 жылдары бұл көрсеткіш 1-1,1 пайыз болған.
Нарықтағы негізгі үлесті міндетті туристік сақтандыру иеленіп отыр. 2025 жылдың алғашқы он айында бұл бағыт бойынша сыйлықақылар 7,6 млрд теңгеге жетіп, 18,6 пайызға көбейді. Сегментте бар-жоғы төрт сақтандыру компаниясы жұмыс істейді, ал олардың бірі барлық сыйлықақылардың 76,1 пайызын жинаған.
Шетелге шығатын азаматтарға арналған ерікті медициналық сақтандыру көлемі де өсім көрсетуде. 2025 жылдың қаңтар-қазан аралығында бұл сегменттегі сыйлықақылар 4,2 млрд теңгені құрап, 10,7 пайыз артқан. Бұл медициналық шығындарды, ауру немесе жарақат алған жағдайда емделуді, қажетті дәрі-дәрмекті, қажет болса эвакуацияны жабатын сақтандыру түрі. Көптеген мемлекеттер виза алу үшін дәл осы сақтандыруды талап етеді.
Туристік сақтандыру бойынша төлемдер көлемі айтарлықтай өсіп, 2024 жылғы 2,7 млрд теңгеден 2025 жылдың қаңтар-қазанында 5,1 млрд теңгеге дейін жетті (88,8 пайыз өсім). Оның ішінде 4,5 млрд теңге – міндетті туристік сақтандыру төлемдері, бұл көрсеткіш жыл ішінде екі есеге артқан. Ерікті медициналық сақтандыру бойынша төлемдер 614,5 млн теңгеге жетіп, 27,5 пайыз өсті.
Дереккөз: Finprom
