Ақтөбе облысында негізгі инфрақұрылымдық жобалардың жүзеге асырылуы жалғасуда. Өңірде биыл ауыз су, газдандыру және тұрғын үй құрылысы бағыттары қарқынды дамып келеді.
Облыс әкімдігінің мәліметінше, 2024 жылы ауылдарды газдандыру аясында 9 мыңға жуық тұрғыны бар 22 елді мекенге табиғи газ жеткізілді. Жыл соңына дейін тағы 3,5 мың тұрғыны бар 6 ауыл газ жүйесіне қосылады.
Осылайша, бір жыл ішінде жалпы 12,3 мың адам тұратын 28 ауылда газ инфрақұрылымы пайда болады. Нәтижесінде өңір халқының газбен қамтылу деңгейі 97%-ға дейін өседі деп күтілуде.
Ауыз су мәселесін шешу де өңірдің басты приоритетінің бірі. Биыл 1,3 мыңнан астам тұрғыны бар төрт ауылға таза ауыз су жеткізілді. Жыл соңына дейін тағы 6 ауыл, шамамен 2 мың адам орталықтандырылған ауыз су жүйесіне қосылмақ.
Тұрғын үй құрылысы саласы да оң қарқын көрсетуде. Үкімет бекіткен жоспарға сәйкес, жыл соңына дейін 1 млн шаршы метр тұрғын үй пайдалануға берілуі тиіс. Қазіргі таңда 10 айдың қорытындысы бойынша 745 мың шаршы метр баспана іске қосылған.
Сонымен қатар, биыл кезекте тұрған 419 отбасы жаңа үйлерге көшірілді. Жыл соңына дейін тағы 1 063 отбасы баспанамен қамтамасыз етіледі.
Дереккөз: Ақтөбе облысының әкімдігі