Ұлттық ғылым онкология орталығы жыл сайын 12 мыңға жуық диагностикалық зерттеу мен ота, 4 мың сәулелік және протондық терапия, сондай-ақ 330-ға дейін ағза мен сүйек кемігін трансплантациялау жүргізеді.
Онкологиялық көмектің барлығы ТМККК және МӘМС аясында тегін көрсетіледі. Соңғы үш жылда онкологиялық қызметтің бюджеті алты есеге ұлғайып, жыл сайын 170 млрд теңгеден астам қаржы бөлінуде.
Орталықтың радиациялық технологиялар бөлімінде радиофармпрепараттар өндіру ісі дамып келеді. Қазіргі уақытта 18F-FDG препаратының өндірісі жолға қойылып, жылына 12 мың ПЭТ зерттеуін жүргізуге мүмкіндік береді. Жақын уақытта тағы 13 препаратты шығару жоспарланып отыр.
Радионуклидтік терапия бөлімшесінде йод-131 негізіндегі препаратпен қалқанша безі қатерлі ісігін емдеу жүргізіледі. Бөлімше жылына 300-ден астам пациентті қабылдай алады.
Медициналық инфрақұрылымды таныстыру барысында жасанды интеллект технологияларын енгізу мәселесіне де ерекше назар аударылды. Орталықта Varian компаниясының EDGE және ETHOS жүйелері бар жеті радиациялық онкология бункері жұмыс істейді. Ал Протонды терапия орталығы Орта Азиядағы жалғыз ProBeam 360 жүйесімен жабдықталған нысан болып саналады. Мұнда жылына 1000-ға дейін науқас, соның ішінде шетелдік пациенттер де ем қабылдай алады.
Гибридті операциялық блоктарда жыл сайын 350-ден астам жоғары технологиялық операция жасалады. Сонымен қатар 250-ден астам маман шетелдің жетекші орталықтарында біліктілігін арттырған.
Дереккөз: ҚР Үкіметі