Биылғы жылдың он айында Ресей порттары арқылы 9,6 млн тонна қазақстандық көмір тасымалданған. Бұл 2024 жылдың осы кезеңімен салыстырғанда 2,5 млн тоннаға (+34%) артық. Атап айтқанда, 6,2 млн тонна (+18%) Балтық теңізінің порттары және 3,4 млн тонна (+83%) Азов-Қара теңіз бассейні порттары бағыттарына жөнелтілген.
Сондай-ақ он айдың қорытындысы бойынша, Қазақстаннан Ресей аумағы арқылы астық экспорты 2024 жылдың осы кезеңімен салыстырғанда 5 есеге артып, 1,9 млн тоннаға жеткен. Ресей порттары арқылы 500 мың тонна экспортталды, бұл өткен жылғы деңгейден 20% жоғары. Жүк Италия, Бельгия, Түркия, Алжир және басқа елдерге бағытталған астық, жасымық және техникалық дақылдардың тұқымдары болып келеді.
Сонымен бірге Қазақстан мен Ресей арасындағы теміржол бағыттары бойынша контейнерлерді тасымалдау да тұрақты өсімді көрсетіп отыр. Есепті кезеңде 650 мың жүк контейнері тасымалданды, бұл өткен жылдың осы кезеңімен салыстырғанда 13% -ға көп.
ҚХР - РФ - ҚХР бағыты бойынша тасымал соңғы алты жылда 15 есеге – 33,4 мыңнан 512 мың контейнерге дейін өсті, ал биылғы жылдың он айында 2024 жылдың осы кезеңімен салыстырғанда тағы 9%-ға ұлғайған.
Дереккөз: ҚТЖ
