Астанада Есіл өзенінің «Нұрлы жол» теміржол вокзалы маңына орташа салмағы 10 грамдық 237 мың ақ амур шабағы жіберілді. Бұл шара ҚР Ауыл шаруашылығы министрлігінің балық шаруашылығы комитетінің мемлекеттік тапсырысы аясында жүргізілді.
Жыл сайын атқарылатын балықтандырудың басты мақсаты – балық ресурстарын сақтау және тұрақты пайдалану, су айдындарының экологиялық жағдайын жақсарту, сондай-ақ басқала тұрғындарының демалысы мен бос уақытын тиімді өткізуіне қолайлы жағдай жасау.
Ақ амур – өсімдік қоректі балық түріне жатады. Ол су айдындарын артық өсімдіктерден табиғи жолмен тазартып, экологиялық тепе-теңдікті сақтауға мүмкіндік береді. Шабақ жіберу өзендегі биологиялық әртүрлілікті арттыруға және балық популяциясын қалпына келтіруге ықпал етпек.
2025 жылдың қорытындысы бойынша Есіл өзенін балықтандыру жоспары толықтай орындалды. Бұл еліміздің су биоресурстарын қалпына келтіру және сақтау жөніндегі мемлекеттік бағдарламаны іске асырудағы маңызды қадам саналады.
Дереккөз: ҚР Ауыл шаруашылығы министрлігі
