Қарағандылық археологтар сақ дәуіріне жататын жауынгердің бұзылмаған қабірін анықтады. Бір метрден асатын тереңдікте табылған ер адамның қаңқасының қасында жебе ұштары мен алтын сырға, оң қолында қола қылыш болған.
Бұл бірегей олжаны Қарағанды облыстық тарихи-өлкетану мұражайының археологтары өткен жазда Ақтоғай ауданындағы Қарабие қорымын қазу кезінде тапты. №1 қорған толығымен сақталған.
«Қабірдің жабынды тастарын алғаннан кейін, біз қаңқаны толық анатомиялық қалпында таптық. Оның оң алақанында қылыш болды. Мұндай олжаға жолықпағанымызға көп жыл болды», – дейді мұражайдың жалпы тарих, археология және этнография бөлімінің меңгерушісі Даурен Жүсіпов.
Жерлеу біздің дәуірімізге дейінгі VII-VI ғасырларға жатады және ғалымдардың пікірінше, ол элиталы жауынгерлер өкіліне тиесілі. Ерекше назар аудартқаны – ұзындығы шамамен 30 сантиметр болатын қос жүзді тұтас құйылған қола акинак. Қару дала жыртқыш құстарының бейнелерімен өрнектелген.
Қылыштың жанынан археологтар бес металл жебе ұшын және алтын сырға тапқан. Заттардың көркемдік стилі Талды-2 қорымынан табылған «Алтын адам» жәдігерлеріне ұқсайды.
Барлық табылған бұйымдар облыстық мұражайдың қорына тапсырылмақ. Ғалымдар ежелгі жерлеудің құпиясын ашу үшін металлографиялық, радиокөміртекті және антропологиялық зерттеулер жүргізуге дайындалып жатыр.
Дереккөз: Қарағанды облысының әкімдігі
