Қарағанды облысы мен Шымкент қаласында отбасылардың әл-ауқатын анықтауда скорингтік модельді пайдаланып, мемлекеттік қолдау шараларын тағайындау бойынша пилоттық жобаны іске асыру жалғасуда. Бүгінде 26,7 мың өтініш берушіге қосымша қолдау шаралары көрсетілді.
Қазіргі уақытта «Тұрғын үй көмегін тағайындау», «Жеке тұрғын үй қорынан жалға алынған тұрғын үйді жалдау ақысының бір бөлігін субсидиялау» және «Мүгедектігі бар балаларды үйде оқытуға жұмсалған шығындарды өтеу» сияқты үш қызметті тағайындау кезінде пилоттық аймақтарда скорингтік модель қолданылады.
Еңбек және халықты әлеуметтік қорғау министрлігінің мәліметінше, пилоттық жоба аясында тұрғын үй көмегі түріндегі қолдауға 1 762 адам өтініш білдіріп, көмек алған.
Сондай-ақ жалдау ақысының бір бөлігін субсидиялауға 1 739 өтініш түсіп, скорингтік модель бойынша оларды қарау нәтижесінде 665 отбасының әл-ауқатының жоғары деңгейі анықталды.
Айта кетейік, мүгедектігі бар балаларды үйде оқытуға жұмсалған шығындарды өтеу қызметіне өтініштер биылғы жылдың 1 қыркүйегінен бастап қабылдана бастады.
Сонымен қатар Шымкент қаласы мен Қарағанды облысы мектептерінің әлеуметтік педагогтары үшін білім беру ұйымдарының студенттері мен тәрбиеленушілеріне қаржылық және материалдық көмек көрсету қызметіне өтініштерді қабылдау кезінде отбасылардың әл-ауқатының деңгейін тексеру функционалдығы енгізілді.
Қазіргі таңда скорингтік модельге қолжетімділікті қамтамасыз ететін платформаны 317 мектеп (Қарағанды облысы – 202, Шымкент қаласы – 115) пайдаланады.
Еске салсақ, отбасының әл-ауқатын анықтаудың скорингтік моделі 23 әлеуметтік-демографиялық және экономикалық критерийлерге негізделген. Қосымша қолдау шараларына өтініш білдірген барлық отбасылар 6 санатқа жіктеледі – аса қажеттіліктен (азық-түлікке қаражаттың болмауы) жоғары әл-ауқатқа дейін (материалдық қиындықтар жоқ). Шешім Отбасының цифрлық картасы арқылы жиналған объективті деректер негізінде автоматты түрде қабылданады.
Көмек барлығына бірдей емес, қажеттілігіне қарай көрсетіледі. Материалдық көрсеткіш ретінде: табыс, мүлік, көлік, несиелердің болуы; және материалдық емес (денсаулық, мүгедектік, білім деңгейі), сондай-ақ тәуелділік ауыртпалығы және жасырын табыстың болуы, мысалы, бейресми жұмыс есепке алынады.
Дереккөз: Еңбек министрлігі
