Біріккен Араб Әмірліктерінің азаматтық авиация билігінің өкілі Сайф Мохаммед Аль-Суэйди мырзамен кездескен қазақстандық делегация ақпарат алмасуды, оқиғалар мен инциденттерді тергеп-тексеру кезінде өзара жәрдем көрсетуді, сондай-ақ жасанды интеллектті енгізу және авиациялық техниканы зерттеу бойынша тәжірибе алмасуды көздейтін келісім жасасты.
Тараптар тергеп-тексерушілердің құзыретін арттыруға бағытталған бірлескен семинарлар өткізуге келісті. Жалпы алғанда, тергеп-тексеру мәселелері бойынша Халықаралық Азаматтық авиация ұйымының (ИКАО) стандарттары мен ұсынымдарына сәйкестік деңгейі 100 % құрайды.
Кездесу барысында екі ел арасындағы жолаушылар ағынының айтарлықтай артқаны, Атырау, Шымкент, Ақтау, Ақтөбе сияқты өңірлік әуежайларына тікелей рейстер ашуға басымдық бере отырып, маршруттық бағыттарды кеңейту мүмкіндіктері сөз болды.
Бұдан бөлек, транзиттік ағымды ұлғайту мақсатында Emirates және Fly Dubai әуе компанияларымен Қазақстанға рейстерді ашу және көбейту мәселелері талқыланды.
Айта кету керек, Etihad Airways компаниясы 2026 жылдың бірінші тоқсанында Алматыға рейстерді қайта жаңғыртуды жоспарлап отыр.
Дереккөз: ҚР Көлік министрлігі
