Республика күні мен Жұмысшы мамандықтары жылы аясында Астанада «Өз Жерім: Urban Nomads» көрмесі жалғасуда. Жоба елдің жетекші суретшілерінің басын қосып, еңбек, шығармашылық және қалалық болмыс тақырыптарын қамтиды, деп хабарлайды елорда әкімдігінің ресми сайты.
Көрме ÓzgeEpic Creative Hub кеңістігінде өтіп жатыр.
Экспозицияға елдің түрлі өңірлерінен келген 20 танымал суретшінің 40-тан астам заманауи туындылары қойылған.
«Өз Жерім: Urban Nomads» симпозиумы тәжірибе және идея алмасу, сондай-ақ заманауи бейнелеу өнерін дамыту үшін ашық алаңға айналды. Жоба шығармашылық бастамаларды қолдауға және мәдени диалогты нығайтуға бағытталған.
Симпозиумға Равиль Абдулов, Алтыншаш Алпысбаева, Анар Әубәкір, Төлеуғазы Байғалиев, Армат Бектас, Бақытнұр Бүрдесбеков, Вадим Быков, Гүлнар Дайырова, Ренат Елубаев, Өмірбек Жұбаниязов, Жұмақын Қайрамбаев, Оралбек Қабоке, Дужан Мағзұмов, Ерлан Назарарқұлов, Жеңіс Нұрлыбаев, Қайыр Оразғалиев, Рахат Сапаралиева, Жанат Сейітхамит, Әкертіс Сұлтанбаев және Талғат Тәтиев сынды 20 белгілі қылқалам шебері қатысты.
Симпозиум аясында суретшілер еңбек, ұжымдық өзара әрекеттестік және адамның қалалық ортамен байланысы тақырыптарын ашатын жаңа шығармалар жасады. Ерекше назар шығармашылық шеберлік сабағына аударылды, онда қатысушылар бірлесе отырып, бірлік, еңбек және шығармашылықты бейнелейтін ауқымды картинаны аяқтады.
«Өз Жерім: Urban Nomads» көрмесі елорда тұрғындары мен қонақтары үшін 15 қарашаға дейін ашық.
Экспозиция ÓzgeEpic Creative Hub кеңістігінде орналасқан, мекенжайы: Бейбарыс Сұлтан көшесі, 12а. Көрме күн сайын 11:00-ден 20:00-ге дейін жұмыс істейді, сейсенбі – демалыс күні. Кіру тегін.