«Astana Tourism» компаниясы Сеулде Астананың туризм саласын таныстыруға арналған роуд-шоу өткізіп, екі елдің туристік индустрия өкілдерін біріктірді. Шара аясында тәжірибе алмасу, туристік өнімдерді таныстыру және жаңа іскерлік байланыстар орнату мүмкіндігі ұсынылды.
«Astana Tourism» басқарма төрағасы Артем Квашук Астананың туристік әлеуеті туралы баяндама жасап, инфрақұрылымдық мүмкіндіктер мен негізгі туристік өнімдерді таныстырды. Оның айтуынша, 2024 жылы Қазақстанға келген корейлік туристер саны 40 мыңнан асып, 12%-ға өсті. Қазақстандықтардың Кореяға сапарлары да 8%-ға артып, 53 мың адамға жетті. 2025 жылдың қаңтар–шілде аралығында Кореяға 38 мың қазақстандық, ал Қазақстанға 17 мыңнан астам корей азаматы келген.
Роуд-шоу аясында Корея туристік қауымдастығымен B2B-кездесулер өтті. Іс-шараға 70-тен астам жетекші туроператорлар мен агенттіктер қатысты. Қазақстан тарапынан Air Astana, «Astana Opera», SkyWay, Shef Tour, Kompas, Tyран Азия, TOP Line компаниялары таныстырылды.
2024 жылы Кореядан Қазақстанға тартылған тікелей инвестиция көлемі 1,2 млрд долларды құрады. Бүгінде корей капиталының қатысуымен 890 бірлескен кәсіпорын жұмыс істейді. «Astana Invest» өкілдері мұндай іс-шаралар инвестициялық климатты нығайтуға ықпал етіп, Астананың экономикасына қосымша корей инвестицияларын тартуға серпін беретінін атап өтті.
Роуд-шоу қорытындысында екі елдің туристік ұйымдары арасында бірқатар меморандумға қол қойылды. «Astana Tourism» пен Tourism Promotion Organization, сондай-ақ Орталық Азия – Корея Республикасы Ынтымақтастық форумының хатшылығы арасында ынтымақтастық туралы келісімдер жасалды.
Қатысушылардың айтуынша, роуд-шоу Астананы туристік және бизнес-бағыт ретінде ілгерілетуге, серіктестік мүмкіндіктерін кеңейтуге тиімді алаң болды.
Дереккөз: Астана әкімдігі