Қазақстан Республикасының Үкіметі биылғы жылы көлік шығындарын субсидиялау бағдарламасын қолдау мақсатында астық экспортына қосымша 7 млрд теңге бөлді. Қаржы мемлекеттік міндеттемелерді орындауға және басым шетелдік нарықтарға жеткізуді одан әрі ынталандыруға бағытталған.
Қосымша қаржыландыру қажеттілігі дақылдардың жоғары өнімділігі мен шетелдік сатып алушылар тарапынан қазақстандық астыққа сұраныстың артуына байланысты туындауда.
Биыл көлік шығындарын субсидиялауға Үкімет қорынан жалпы 31 млрд теңге бөлінді. Қаражат қазақстандық өнімнің жаңа экспорттық бағыттарға шығуын, бұрынғы нарықтарға қайта оралуын және баламалы логистикалық бағдарлар арқылы алыс шет елдерге экспорт көлемін ұлғайтуға мүмкіндік берді. Жүзеге асырылған шаралардың нәтижесінде жаңа және қалпына келтірілген нарықтарға 2,5 млн тоннадан астам астық жеткізілді.
Сондай-ақ, бұған дейін 2026 жылға арналған көлік шығыстарын субсидиялау бағдарламасы кемінде 30 млрд теңге көлемінде қаржыландыру арқылы ұзартылды. Бұл шара қазақстандық астық экспортының тұрақтылығы мен бәсекеге қабілеттілігін қамтамасыз етуге бағытталған.
Дереккөз: ҚР Үкіметі
