Шығыс Қазақстан облысы еліміздегі ең ірі өнеркәсіптік аймақтардың бірі болғандықтан, экология мәселелері жергілікті тұрғындардың назарында. ҚР Экология және табиғи ресурстар вице-министрі Жомарт Әлиев өңірге жұмыс сапарында кәсіпорындардың шығарындыларын төмендету және экологиялық бақылауды күшейту тақырыбын талқылады.
Қауіптіліктің бірінші санатындағы 67 кәсіпорынның ішінде «Қазмырыш», «Үлбі металлургия зауыты», «Өскемен Титан-Магний комбинаты», «Өскемен ЖЭО» және «Бұқтырма цемент компаниясы» сияқты ірі өндірістер бар. Олардың үлесіне қоршаған ортаға бөлінетін улы заттардың 62,5%-ы тиесілі. Өткен жылдың сәйкес кезеңімен салыстырғанда өңірде олардың көлемі 2 мың тоннаға (1,5%) азайды.
Экологиялық бақылауды күшейту үшін 20 кәсіпорында автоматтандырылған мониторинг жүйелері орнату жоспарланған. Қазіргі таңда 10 жүйе жұмыс істеп, деректерді нақты уақыт режимінде беріп отыр.
2023-2025 жылдарға арналған өңірдің экологиялық проблемаларын шешу жөніндегі Жол картасы бойынша жоспарланған 66 іс-шараның 40-ы орындалды.
Қалдықтарды басқару мәселесі де жіті назарда. Облыстағы 165 полигонның тек 21-і (12,7%) санитарлық нормаларға сәйкес келеді. 2025 жылдың 9 айында 186 заңсыз полигон анықталып, оның 111-і жойылды. «Эко-Қолдау» бағдарламасы жаңартылып, қалдықтарды қайта өңдеуге арналған инвестициялық жобаларды жеңілдікпен қаржыландыру тетігі іске қосылды.
