Астанада өткен Қазақстан-Швейцария іскерлік кеңесінің бесінші отырысы шеңберінде швейцариялық делегация, соның ішінде экономика, білім және зерттеулер федералды департаментінің басшысы Ги Пармелен Stadler Kazakhstan өндіріс алаңына барып, жаңа үлгідегі жолаушы вагондарын көрді.
Зауыт «Жолаушылар тасымалы» АҚ үшін купе және плацкарт вагондарын дайындауды бастап кетті. Алғашқы партия биыл желтоқсанда беріледі. Stadler Kazakhstan шығарған вагондар халықаралық стандарттарға сай жасалып, жеңіл салмақты, қауіпсіздік деңгейі жоғары, жол жүрісін айтарлықтай жақсартатын заманауи технологиялармен жабдықталған. Компания 20 жыл бойы сервистік қызмет көрсетуді де өз мойнына алады.
Жалпы келісім аясында 2030 жылға дейін 557 жаңа вагон өндіріледі. Бұл еліміздің темір жол паркін жаңартудағы ең ірі жобалардың бірі болып саналады.
Кеңес барысында машина жасау, логистика және өнеркәсіп салаларындағы ынтымақтастықты кеңейтетін алты келісімге қол қойылды. Оның ішінде Қазақстандағы Stadler өндірісін одан әрі дамытуға қатысты инвестициялық келісім ерекше маңызға ие.
Дереккөз: ҚТЖ