Бірыңғай жинақтаушы зейнетақы қорының 2014 жылы активтер шоғырландырылған кезден бастап 2025 жылғы 1 қарашаға дейінгі кезеңдегі жинақталған таза инвестициялық кірісі 13,60 трлн теңгеге жетті. Бұл көрсеткіш зейнетақы жинақтарының жалпы көлемінің 42,3%-ын құрайды.
БЖЗҚ қысқа мерзімді кірістілік көрсеткіштері активтерді басқару тиімділігін толық көрсете алмайтынын атап өтті. Себебі қаржы құралдары бойынша сыйақылар бағалы қағаздар құны мен валюта бағамдарының қысқа мерзімді ауытқуларын әрдайым өтей бермейді. Сондықтан инвестициялық кірісті талдау кем дегенде бір жылдық динамика негізінде жүргізілуі тиіс.
2024 жылдың қарашасынан 2025 жылдың қазанына дейінгі 12 ай ішінде есептелген инвестициялық кіріс 2,82 трлн теңгені құрап, кірістілік 12,58% болды. Ал жұмыс берушінің міндетті зейнетақы жарналарынан қалыптасқан активтердің кірістілігі осы кезеңде 7,51% деңгейінде тіркелді.
БЖЗҚ орта және ұзақ мерзімді перспективада нақты оң кірістілікті (инфляциядан жоғары) қамтамасыз етіп келеді. 1998 жылы жинақтаушы зейнетақы жүйесі құрылған сәттен 2025 жылғы 1 қарашаға дейінгі кезеңде жинақталған инвестициялық кірістілік 1062,38%, ал жалпы инфляция 925,20% болды.
Дереккөз: БЖЗҚ
