Қазақстанда кәсіпкерлік секторының дамуы жалғасып, шағын және орта бизнестің (ШОБ) экономикадағы рөлі күшейіп келеді. ОКҚ-да өткен баспасөз жиынында Ұлттық экономика вице-министрі Ерлан Сағынаев ШОБ ЖІӨ-дегі үлесі тұрақты өсіп, 2025 жылдың алғашқы алты айының қорытындысы бойынша 39,8%-ға жеткенін мәлімдеді.
Айтуынша, өңірлер бойынша ең жоғары көрсеткіш Алматы, Астана, Шымкент қалаларында, сондай-ақ Алматы, Батыс Қазақстан және Маңғыстау облыстарында байқалған. Биылғы екінші тоқсанда кәсіпкерлік секторында жұмыспен қамтылғандар саны 3,9%-ға өсіп, 4,4 млн адамға жеткен.
«2025 жылдың екінші тоқсанында тіркелген ШОБ субъектілерінің 91,2%-ы белсенді жұмыс істеп тұр, бұл сектордың тұрақты дамып жатқанын көрсетеді. Ал бірінші жартыжылдықта ШОБ шығарған өнім көлемі 25%-ға өсіп, 42,7 трлн теңгені құрады», – деді министрлік өкілі.
Өнім өндірісінің өсуіне бес негізгі сала – сауда, өнеркәсіп, құрылыс, көлік және қоймалау, сондай-ақ ауыл, орман және балық шаруашылығы айтарлықтай ықпал етіп отыр.
ҰЭМ өкілі ЕҚДБ-мен бірлесіп орта кәсіпорындардың өндірісін 2–3 есе арттыруға мүмкіндік беретін жаңа қолдау бағдарламасы әзірленіп жатқандығын хабарлады. Бағдарлама аясында кәсіпорындар диагностикадан өтіп, жекелеген даму жоспарларымен қамтамасыз етіледі.
«Бүгінде орта бизнес негізінен өңдеу өнеркәсібінде шоғырланған. Бұл сала ШОБ жалпы өнімінің шамамен 12%-ын құрайды және әлі де зор өсу әлеуетіне ие. Өндірістік қуаттарды толық пайдаланбау жаңа мүмкіндіктер ашады», – деп атап өтті ол.
Дереккөз: ҚР Ұлттық экономика министрлігі