Қарағанды қаласының №2 көпсалалы ауруханасында жүрекшелердің жыбырлауын (фибрилляция) емдеуге арналған инновациялық абляция әдісі қолданыла бастады. Жүрекішілік ультрадыбыстық сезгі қолдану арқылы жасалатын жаңа тәсіл бұрын міндетті болған рентген-навигацияны алмастырып, отаның қауіпсіздігін айтарлықтай арттырады.
Аталған технология бойынша шеберлік сабағын Новосібірден келген аритмияларды катетерлік әдіспен емдеу және Zero-fluoro техникасы бойынша сарапшы Илья Стенин өткізді.
Мамандардың айтуынша, жүрек ішіне енгізілетін диаметрі небәрі 5 мм ультрадыбыстық сезгі жүректі нақты уақыт режимінде көруге мүмкіндік береді. Бұл ота барысындағы дәлдікті арттырып, нәтижесінде аритмияның толық жойылуына және пациенттің қалыпты өмірге оралуына жағдай жасайды.
«Инновацияның арқасында біз жүрек құрылымын рентгенсіз-ақ көре аламыз. Бұл әдіс әрі қауіпсіз, әрі тиімді», – деді аурухананың аритмолог-хирургі Нұрлан Елемесов.
Жоғары технологиялық ота міндетті әлеуметтік медициналық сақтандыру жүйесі аясында тегін жасалады. Кезек күту мерзімі 1–2 айдай уақыт қана.
Дәрігерлердің айтуынша, Қарағанды тұрғындарының 2–3%-ы жүрекшелер фибрилляциясынан зардап шегеді, ал жаңа әдіс олардың көпшілігіне сапалы ем алуға мүмкіндік береді.
Дереккөз: Қарағанды облысының әкімдігі
