2029 жылға дейін «Ауыл аманаты» бағдарламасына 600 миллиард теңгеге жуық қаражат бөлінеді, деді Қазақстан Президенті Қасым-Жомарт Тоқаев бүгін ауыл әкімдерінің диалог-платформасында.
Президент алдымен ауыл шаруашылығы кооперативтерін дамыту қажеттігі туралы айтты. Оның сөзінше мемлекет бұл бағытта біршама жұмыс атқарды, алайда бірлескен шаруашылықтар әзірге ауыл экономикасының тірегі бола алмай тұр.
«Көбіне мұндай кооперативтерді бірнеше адам ғана құратыны жасырын емес. Олар жеке шаруашылық иелері және өнім өңдеушілер арасында делдал болып жүреді. Соған қарамастан мемлекеттен жеңілдіктер алады. Рас, мұндай теріс әрекеттерге тыйым салынбаған. Бірақ бұл ауыл халқының әл-ауқатын арттыруға кедергі келтіреді», деді Тоқаев.
Сонымен қатар бірлестік (кооператив) құру бүкіл ел бойынша жүргізілгенде ғана ауыл халқы оның игілігін сонда ғана көретінін атап өтті.
«Жеке шаруалар біріге алмаса, мемлекеттің ауыл шаруашылығын дамыту жолындағы бар еңбегі зая кетеді. Сондықтан бұл жұмысты белсенді түрде қолға алуымыз қажет. «Ауыл аманаты» жобасы өз кәсібін дамытқысы келетін ауыл тұрғындарына мол мүмкіндік беруде. Жоба аясында екі жылдың ішінде 20 мыңға жуық жұмыс орны ашылды. 2029 жылға дейін осы бағдарламаға 600 миллиард теңгеге жуық қаражат бөлінеді», деді Президент.
